साहित्यकार 'महाप्रकाश'क स्वास्थ्य चिंताजनक

कलकत्ता. मैथिलीक वरिष्ठ कवि-कथाकार महाप्रकाश लगभग डेढ़ मास सँ गंभीर रूपसँ बीमार छथि. किछु दिन सहरसामे इलाजक बाद हुनका पटना रेफर कएल गेल छल मुदा ओतहु कोनो खास सुधार नहि हेबाक कारणेँ एखन दिल्लीक सफदरगंज अस्पताल मे इलाजरत छथि. किडनी एवं फेफड़ामे संक्रमणक चलतेँ हुनका आइसीयू मे वेन्टिलेटर पर राखल गेल अछि. एकटा मध्यमवर्गीय परिवारसँ आबय बला महाप्रकाश आर्थिक समस्यासँ सेहो निरंतर लड़ि रहल छथि. हुनका दू गोट बालक छनि. दुनू निजी कंपनी मे कार्यरत छनि. हुनक छोट बालक अजित प्रकाश उर्फ मोनू जनतब देलनि जे एखनधरि हुनका इलाजपर करीब तीन लाखसँ बेसी टाका खर्च भऽ गेल अछि मुदा, हालति मे कोनो खास सुधार नहि भेल अछि.
महाप्रकाशक सेवा-सुश्रुषा'क लेल हुनक जेठ बालक अमित प्रकाश उर्फ सोनूकेँ अपन चाकरीक त्याग सेहो करय पड़ल अछि जाहिसँ आर्थिक संकट आओर बढ़ि गेल अछि. एहि बीच महाप्रकाशक किछु शुभचिंतक साहित्यकार मित्र-मण्डली लोकसँ आर्थिक सहयोगार्थ अपील सेहो कएने छलाह मुदा, प्राप्त जानकारीक अनुसार एखन धरि हुनक परिवार केँ कोनो खास सहयोग नहि भेटल अछि. तखन दिल्लीमे रहनिहार किछु साहित्यकार आ मित्र निरंतर हालचाल पुछैक लेल अबैत रहैत छथि. मोनू अपन पिताक शीघ्र स्वस्थ्य हेबाक लेल लोकसँ इश्वरक प्रार्थना करबाक आस रखैत छथि. दिनसँ दिन हुनक बिगड़ैत स्वास्थ्यपर मैथिली साहित्य जगतमे चिंता पसरल अछि. साहित्यकार गंगेश गुंजन, रमानंद झा 'रमण', रामलोचन ठाकुर, अनलकांत, शुभेन्दु शेखर, श्रीधरम, आदि हुनकर शीघ्र स्वास्थ्य लाभक कामना कएलनि.   
(Report: मिथिमीडिया डेस्क)