देशक सबसं प्रतिष्ठित फिल्म पुरस्कार "राष्ट्रीय फिल्म पुरस्कार" केर विजेता सबहक घोषणा भेल अछि. ई एहि पुरस्कार केर 69म संस्करण अछि जाहि मे मुख्य रूप सं 2021 मे रिलीज भेल फिल्म सबकें शामिल कएल गेल अछि.
विजेता लोकनिक घोषणा दिल्लीक नेशनल मीडिया सेंटर मे एक प्रेस कॉन्फ्रेंस माध्यम सं कएल गेल. निर्देशक नीरज कुमार मिश्र केर फिल्म समानान्तर कें मैथिली भाषाक बेस्ट फीचर फिल्म केर राष्ट्रीय पुरस्कार भेटल अछि. सम्पूर्ण टीम कें हार्दिक बधाइ! 💐
फिल्म निर्माता, निर्देशक नीरज कुमार मिश्रा पछिला दू दशक सं बंबइ केर फिल्मी दुनिया मे कार्यरत छथि। जीवन आ कर्म केर सामान्य दर्शन संग ओझराएल चारि कठिन कथानक कें एक दार्शनिक-सह-डेराओन रूप मे फिल्म मे देखाओल गेल अछि.
फिल्म समानांतर मे अभिनेता अनुराग ठाकुर, प्रियांशु राजगुरु, कुंदन कुमार वर्मा आ शाश्वत आनंद अभिनय केलनि अछि. फिल्म केर पहिल स्क्रीनिंग पटना केर मोना सिनेमा मे भेल छल.
एहि सं पहिने निर्देशक नितिन चंद्रा केर फिल्म मिथिला मखान कें राष्ट्रीय फिल्म पुरस्कार भेटल छल. लगातार राष्ट्रीय स्तर पर चर्चित भ' रहल मैथिली फिल्म सबसं निश्चय भाषा मे फिल्म उद्योग स्थापना कें बल भेटत. 💗
