अन्हार पर इजोतक विजय केर ई पावनि दीयाबाती जन-जन सँ जुड़ल अछि। माँ लक्ष्मी केर आराधना केर संगहि राति मे कालीपूजा सँ मिथिला केर माहौल श्रद्धा-सिक्त रहैत अछि। दीयाबातीक लेल अनेकानेक कथा प्रचलित अछि। सोझ शब्द मे कहल जाए तऽ सुख-समृद्धि ओ आकांक्षा कें नव पाँखि देबए आ अपार हर्खक ओरियान केर पावनि अछि दीयाबाती।
धनतेरस - माता लक्ष्मी केर स्वागत
मिथिला परम्परा मे समांग (स्वास्थ्य) केर बेस महत्व रहल अछि। समांग अछि तऽ धन होएत, समांग नहि तऽ धन भेनहि की होएत। एहि मान्यता अनुसार, लक्ष्मी आराधना सँ पहिने धनतेरस मनाओल जाइत अछि। एहि मे स्वच्छता आ स्वास्थ्य सजगता पर बल देल जाइत अछि। मान्यता अनुसार, एही दिन समुद्र मंथन सँ आयुर्वेद केर देवता भगवान धन्वंतरि अपन हाथ मे अमृत कलश लऽ प्रकट भेलाह। एहि दिन भगवान सँ उत्तम स्वास्थ्य लेल प्रार्थना कएल जाइत अछि। धनतेरस दिन माता लक्ष्मी केर स्वागत लेल धातु केर बर्तन (पीतल, तांबा, कांसा) आ सोना-चांदी केर गहना किनबाक सेहो परंपरा अछि। एहि दिन कागपूजा काग कें यमदूत मानि भोजन कराओल जाइत अछि।
रूप चतुर्दशी, भूत चतुर्दशी - स्वास्थ्य संग रूपरंग
यमपंचक केर दोसर दिन कतहु रूप चतुर्दशी कतहु भूत चतुर्दशी मनाओल जाइत अछि। कहल जाइत अछि जे भगवान कृष्ण नरकासुर कें वध कऽ आपस आएल छलाह आ स्नानादि क सजल-धजल छलाह। तैं एकरा रूप चतर्दशी कहल जाइत अछि। ओतहि मान्यता अछि जे पितर लोकनि एहि दिन धरती पर विचरण करैत छथि तैं एकरा भूत चतुर्दशी सेहो कहल जाइत अछि। बंगाल मे ई प्रमुखता सँ मानओल जाइत अछि। एहि दिन कुकुरपूजा कुकुर कें यमदूत मानि भोजन कराओल जाइत अछि। एहि दिन कें आजुक लोक छोटकी दिवाली सेहो कहैत छथि।
दीयाबाती : मिथिला मे दीपावली - Mithila Me Deepawali
घर-आँगन केर साफ-सफाइ केर पश्चात गोबर सँ नीपल जाइत अछि। ओहुना दीयाबती हेतु घर-आँगन पहिने सँ चकाचक कएल गेल रहैत अछि। भगवती घर मे गोसाओन लग अरिपन देल जाइत अछि। कहल जाइत अछि जे आजुक दिन भगवती बहराइत छथि। फेर देवोत्थानक एकादशी दिन घरवास करैत छथि। कृषक लोकनि दीयाबाती कें गौपूजा गौमाता केर पूजन सेहो करैत छथि। साँझ होइते घर-दुआरि दीप सँ चकमक करए लगैत अछि। सांझू पहर लोक फटक्का आदि छोड़ैत छथि। हुक्का-लोली सेहो जराओल जाइत अछि, जे भगवती घर सँ लोक गामक बाहरी भाग मे पोखरि वा बाध दिस जा फेकैत अछि।
मान्यता अछि जे एहि समय पितर लोकनि भूलोक पर अपन परिजन कें आशीर्वाद देबाक लेल विचरण करैत छथि। हुनका लोकनि कें हुक्का-लोली द्वारा पितरलोक दिस प्रस्थान करबाक लेल संतति द्वारा इजोत देल जाइत छनि। हुक्का-लोली एही इजोत केर प्रतीक रूप मे भाँजल जाइत अछि।
साँझ राति लक्ष्मी-गणेशक पूजन सेहो कएल जाइत अछि। राति बढ़ने कालीपूजन केर सेहो प्रथा अछि। बंगाल मे एहि दिन कालीपूजा प्रमुखता सँ मनाओल जाइत अछि। मुदा लोक मिथिला मे दीयाबती केर संगहि लक्ष्मी-गणेश केर पूजन करैत छथि ओ राति मे काली पूजन करैत छथि। गाम-गाम काली माए केर प्रतिमा बना पूजन कएल जाइत अछि। जतए काली मंदिर अछि, ओतए एहि दिन फराके माहौल रहैत अछि। बेसी ठाम दीयाबाती सँ शुरू भऽ पंचदिवसीय काली पूजनोत्सव आयोजित कएल जाइत अछि।
गोधन पूजा केर विधान - Godhan or Govardhan Puja
दीयाबाती केर अगिला दिन अर्थात कार्तिक मास केर शुक्ल पक्ष प्रतिपदा कें गोवर्धन पूजा कएल जाइत अछि। एहि दिन बलि पूजा, अन्न कूट, मार्गपाली आदि उत्सव सेहो मनाओल जाइत अछि। एहि पावनि केर मिथिलाक लोकजीवन मे विशेष महत्व अछि। एहि पावनि कें लऽ कथा ओ मान्यता सेहो जुड़ल अछि। श्रीकृष्ण ओ गोवर्धन केर कथा प्रसंग सँ केऽ परिचित नहि अछि।
एहि दिन मिथिला मे माल-जाल केर दुलार होइत अछि। गोधन केर पूजन कएल जाइत अछि। गाय आ बरदक थैर मे गोबर, पिठार ओ सिन्दूर सँ गोवर्धन बना पूजा कएल जाइत अछि। मिथिलाक कृषि परम्परा मे पशु केर महत्व बहुत बेसी अछि। एहि दिन गौवंश, विशेष रूप सँ बरदपूजा बरद केर पूजन कएल जाइत अछि।
एहि दिन माल-जाल कें तेल ओ बकेन पीयाओल जाइत छै। सिंघ मे तेल लगाओल जाइत छै। गोधन कें पान-सुपारी सेहो देल जाइत छै। माल-जाल कें नवका नाथ-गरदानी पहिराओल जाइत अछि। चरवाह आ जन-बोनिहार जे कृषि कार्य मे सहयोग करैत छथि, हुनका एहि दिन नओत दऽ खुआओल जाइत अछि। बहुतो लोक जन-बोनिहार कें सीधा सेहो देइत छथि।
एहि दिन पहलवानी खेलएबाक सेहो परंपरा रहल अछि। एहि दिन मिथिलाक धीया नवनिआ (लवनिआ) चिपड़ी पथइ छथि। एही चिपड़ी सँ नवान्न केर अन्न उसनए लेल चूल्हा पजाड़ल जाइत अछि। मिथिला मे बेटी कें गौरी, सीता ओ लक्ष्मी स्वरूप मानल जाइत अछि। एहि परम्परा सभक गहींर अर्थ अछि, जकर विवेचना जतेक करबैक से कम होएत।
यम द्वितीया कें चित्रगुप्त केर पूजन - Yama Dwitiya
दीयाबातीक दू दिन बाद अर्थात यम द्वितीया कें चित्रगुप्त पूजा कएल जाइत अछि। एहि दिन कलम आ चित्रगुप्त केर पूजन कएल जाइत अछि। प्रचलित कथाक अनुसार चित्रगुप्त ब्रह्माक पुत्र छथि। एहि संदर्भ मे एक कथा अछि जे यमराज सृष्टिक आकार बढ़ने सृष्टिक रचनाकार ब्रह्माजी लग पहुँचलाह आ प्राणीक पाप-पुण्य केर लेखा-जोखा रखबा लेल कोनो ठोस बेवस्था करबाक लेल कहलनि।
यमराज अपना लेल योग्य मंत्रीक व्यवस्था करबाक प्रार्थना कयलनि। ब्रह्माजी यमराज कें समाधान तकबाक आश्वासन दऽ समाधि मे चल गेलाह। एगारह हजार सालक समाधिक बाद ब्रह्मा जी केर काया सँ एक दिव्य पुरुष उत्पन्न भेल। श्यामल वर्ण केर एहि दिव्य पुरुषक कमल समान नेत्र छल, कान मे कुण्डल, गऽर मे मुक्तासर, शरीर पर पीताम्बर वस्त्र आ हाथ मे कलम दवात छल। उत्पन्न पुरुष भगवान ब्रह्मा सँ अपन नाम आ काज पुछलनि तऽ ब्रह्मा जी कहलनि, अहाँ हमर काया सँ उत्पन्न भेल छी तैं अहाँ कायस्थ छी। अहाँ हमर चित्त-चित्र मे गुप्त छलहुँ तैं अहाँक नाओ चित्रगुप्त होएत। अहाँ यमलोक जा मनुक्खक पाप-पुण्य केर लेखा तैयार करब। कायस्थ लोकनि चित्रगुप्तक वंशज मानल जाइत छथि।
एहि दिन मिथिला मे कायस्थ लोकनि कलम-दवात संगहि चित्रगुप्त केर प्रतिमा पूजन सेहो करैत छथि। कलम-दवात केर पूजन मे कायस्थ सहित मिथिलाक अन्य वर्णक लोक सेहो भाग लेइत छथि। देश-विदेश मे रहनिहार मैथिल लोकनि ई पावनि मनबैत छथि।
भरदुतिया केर धूम - Bhai Dooj
भरदुतिया कार्तिक मासक शुक्ल पक्ष केर द्वितीया तिथि कें मनाओल जाइत अछि। एकरा यम द्वितीया सेहो कहल जाइत अछि। भ्रातृपूजा भरदुतिया मे बहिन भाएक ललाट पर पिठार आ सिंदुरक ठोप कऽ उज्ज्वल भविष्यक कामना करैत अछि। मिथिला मे एहि अवसर पर भाइ उपहार वा नगद देइत अछि। ई पर्व भाइक प्रति बहिनक प्रेम केर सूचक अछि।
एहि पावनि लेल एकटा कथा सेहो प्रचलित अछि। यम देवता अपन बहिन जमुना कें एही दिन दर्शन देने छलाह। यम महाराज व्यस्तता केर कारणें अपन बहिन सँ भेट नहि कऽ पबैत छलाह। एहि दिन बहिन ठाओ पीढ़ी कऽ भाइ केर बाट तकैत अछि। मिथिला मे अलग तरहक अरिपन पाड़ल जाइत अछि।
मिथिला मे यमपंचक पावनि पश्चात छठि पूजा केर तैयारी शुरू होइत अछि। संगहि माए-बहिन सामा-चकेवा खेलएबाक ओरिआन मे लगैत छथि। एहि पावनि सभक माध्यम सँ कृषक समाज फसिलक कटनी, नव फसिलक रोपनी आदि काज लेल पर्याप्त उर्जा जोगा लेने रहैत छथि। दीयाबाती एकदिस यमराज-पितर सँ जुड़ल अछि, ओतहि दोसरदिस लक्ष्मी-काली पूजन, कृषिकाज आदि सँ सेहो समान रूप सँ युक्त अछि।