लगे मोछमे मटिया तेल !! - मिथिमीडिया - Maithili News, Mithila News, Maithil News, Digital Media in Maithili Language
लगे मोछमे मटिया तेल !!

लगे मोछमे मटिया तेल !!

Share This
सासुर सन लागै छनि संसद
नैहरि सन लागैत छनि जेल
लगे मोछमे मटिया तेल !  

ऊँचगर आसन रसगर भाषण
कागते धरि सकुचल सुशासन
लूटि रहल छै नेता सभकिछु
जनता बैसल बनि बकलेल |
लगे मोछमे मटिया तेल !

गृहमंत्री निज गृहमे बाँझल
वित्तमंत्री हँसोथए पर लागल
शिक्षामंत्री अजगुत भेटला
दसमामे छथि दू बेर फेल।
लगे मोछमे मटिया तेल !

सासुर-नैहरि दूनु रमनगर
लागै छनि तें दूनु पियरगर
जेलसँ छूटिते संसद पहुँचथि
संसदसँ फेर सीधा जेल।
लगे मोछमे मटिया तेल !

सरकारक एंड़ी तर दाबल  
सीबीआइ नाथल-जाबल
नेता सभ संग खेलै देखू
सांप छुछुन्नर के ई खेल।
लगे मोछमे मटिया तेल ! 

— पंकज चौधरी 'नवलश्री'

Post Bottom Ad